وانت مستني تعمل انترفيو وارد جدا (ده اكيد) الاتش ار يتأخر عليك بسبب أو من غير ، لازم وانت رايح تكون عامل

حسابك علي كده وتحط في اعتبارك النقاط دي .

– انت المتضرر الوحيد من انك تسيبهم وتمشي هما مش هايبقي فارق معاهم ، هايعتبرو انك ماجتش من الأساس

– اياك تتعصب أو تبين انك متضايق حتي لو بينك وبين نفسك عشان ده هياثر عليك في الانترفيو.

– طالما جيت الانترفيو واخدت إجازة وعملت حسابك خلاص اعمل اللي انت جيت عشانه.

– الفترة اللي انت مستني تعمل فيها الانترفيو اعمل اي حاجة بتحبها اقرا حاجة علي الانترنت افتح فيسبوك،

توقع الأسئلة اللي ممكن تتقالك.

– اتعود تكون مبتسم دائما ، هايفرق كتير الابتسامة بتدي طاقة إيجابية كدة كدة.

زمايلنا اللي في HR رفقا بالناس اللي بتيجي تعمل انترفيو الموضوع بيضايق جدا.

نقاط مهمة واجب مراعتها :-

1 – توصل للشركة متاخر:

(معلش تعالى على نفسك ياسيدى ، واصحى بدرى شوية ، واعمل حساب المسافة من البيت للشركة اللى انت

رايحها ، المهم انك لازم تكون هناك قبل المعاد بربع ساعة على الاقل) .

2- انت مش عامل الواجب بتاعك

(واجب ؟؟ واجب ايه ياعم ؟ اه ياسيدى عندك واجب قبل ما تروح للانترفيو ، انك تدور على الشركة على النت

، شغالة فى ايه ، بتعمل ايه ، ايه المواصفات والصفات المطلوبة اللى الشركة بتدور عليها ، هو ده بس ؟

لا تعالى هنا بس ايه ، انت كمان المفروض تتدرب هتقول ايه ومش هتقول ايه فى الانترفيو ، جرب مع صحابك

، اخواتك ، بلاش تجرب مع الراجل اللى هيعملك الانترفيو وتكشتف عنده انك بوظت الدنيا ).

3 – Dress code

( ايه ده ياحاج ؟ ده سيادتك الزى المناسب حضرتك وانت رايح الانترفيو ، هو اللبس بيفرق ؟

هههه اه سيادتك ، لما الشركة اللى انت رايح تعمل فيها الانترفيو ، كل الناس اللى شغالة لابسة فورمال وبدل ،

وانت رايح لهم ضارب T-shirt وياسلام بقى الوان فاقعة فسفورى وبمبى ، هيقولك لف وارجع تانى قبل

ما تدخل المكتب ، طب اعمل ايه معنديش بدل ، خلاص يا سيدى قميص وبنطلون قماش وجزمة –

ومتنساش علبة نعناع كلورتس كده علشان النفس :p )

4- انك ما تعرفش تجاوب الاسئلة كويس ، وتوصل قد ايه انت راجل كويس فى شغلك وعندك خبرة و مهارات

ممتازة ، وده هيكون ناتج انك متوتر فعلشان كده ، لازم تتدرب هترد ازاى ، احنا مش عايزين نضيع الفرصة دى

مننا صح ولا ايه ؟ 😀

5 – اسلوب معاملتك فى الانترفيو

بيفرق طريقة معاملتك اثناء المقابلة ، فى ناس الحميمة بتبقى زايدة عندهم فى المقابلة و بيعامل interviewer على

انه واحد صاحبه ، او واحد بيعمل العكس وبيكون جاف فى المعاملة ويقول لنفسه هم يطولوا انى انا اشتغل عندهم ،

وواحد تانى تلاقيه قاعد مكسوف ، وواحد تانى سرحان ، كل الحاجات دى بتخلى اللى بيعمل معاك الانترفيو يحكم

عليك انك لا تصلح للوظيفة ، علشان كده اهم حاجة الاعتدال فى المعاملة ، و الطريقة اللى بتسلم بيها على الراجل ،

كمان خلى بالك انك تكون متوتر وقافل ايدك طول الوقت وايديك عرقانه وتروح تسلم على الراجل :p ، وكمان

مش اول ما تدخل تروح قاعد على طول والراجل واقف بيسلم عليك استنى وهو هيقولك اتفضل ما تقلقش ،

ههههههه ما تعملش زى هانى رمزى فى فيلم غبى منه فيه لما بيقول لما الحقلى مكان بقى 😀

6- ما بتسالش اية اسئلة فى الانترفيو

برضه بتدى انطباع انك مش مهتم بالوظيفة ، او انت مش فارقة معاكواهى شغلانة و السلام ، خلى بالك بتاع الاتش ار مش

بعين اى حد والسلام لا هو بيختار احسن شخص مناسب للوظيفة فا لو حس منك انك مش متحمس للوظيفة هياخد فكرة

عنك انك واخد الشغل كوبرى ، طب ايه الاسئلة اللى ممكن اسالها ؟

7- انت ما عرفتش تسوق نفسك كويس

ازاى هو الموضوع ده كمان فيه تسويق ؟ اه فيه انت ما تعرفش المثل اللى بيقولك اهم من الشغل تظبيط الشغل 😀 ،

هو كده بالظبط لازم تسوق لنفسك صح ، مثلا : انا يافندم دخلت فى projects كذا كذا و كان مطلوب مننا ننفذ كذا فى

حدود تكلفة كذا والحمد لله انا عملت كذا فوفرت على الشركة مبلغ كذا وكمان قدرنا نخلص الشغل المطلوب مننا قبل المهلة

المحددة باسبوع 😀 ، بذمتك انت نفسك حد من صحابك بيقولك عمل كده فى الشغل عنده إنطابعك عنه هيكون ايه

8- المتابعة

اعمل ايه ؟ مفيش ياسيدى اميل شكر للشركة اللى انت عملت معاها الانترفيو ، اشكرهم فيها على المقابلة ، طب ايه لازمتها

، لازمتها انك تفضل فى ذاكرة الاتش ار ، انت مفكر انك الوحيد اللى عملت معاهم انترفيو ؟ كمان تفتكر كام واحد هيبعت

خطاب شكر للشركة ، فميز نفسك عن باقى المتقدمين ، وكمان بتبين قد ايه انك واد بروفيشنال 🙂

واهم حاجة انك تكون واثق فى نفسك انك فعلا كفاءة تضاف الى اى شركة وانك هتلاقى شغل ان شاء الله ، وما

تسمعش للناس اللى بتقولك مفيش شغل ، لا فى بس المشكلة ان الناس بتكون مستعجله على وظيفة الاحلام ، اعمل

اللى عليك وابدأ واخلص فى شغلك الحالى واتقن عملك ، الوظيفة هتجيلك بأسرع مما كنت متوقع 😀

وبالتوفيق للجميع

اقرا لي :

فن التفوق علي منافسيك
افضل 7 طرق لتحسين مهاراتك التفاوضية

أول يوم عمل ليك في الشغل الجديد

التصنيفات: شروحات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *